Hello Mithila

एकटा नवका सर्वे आएल अ. ई सर्वे चिंताक बात छै. सर्वे में कहल गेल छै जे बिहार में सय टा में से पचहत्तर टा टीचर... मास्टर साहेब कोनो न कोनो रूपे तम्बाकू के सेवन करय छथिन्ह. ई तs चौंकाबय वाला खबर छैबे छै जे जिनका ऊपर ई जिम्मेदारी छनि जे ओ बच्चा... नुनु सभ में नीक संस्कार देथिन्ह... नीक- नीक गप्प सीखयथिन्ह ओ खुद एकर सेवन कय रहल छथिन्ह. ओना बिहार में कई ठाम एकरा खराब नहिं मानल जाय छै. कई घर में मर्द-जनानी सभ गोटे के खैनी... सुपारी... पान खाइत देखल जा सकय अ. महिला वर्ग में सेहो एकर खपत बढ़ल अछि. एकर शरीर पर बड़ खराब असर पड़य छै. गर्भवती महिला के लेल तs ई आओर खतरनाक छै. देश में हर साल लाखों लोकक मौत तम्बाकू के सेवन सं होए छै. कइटा गाम में तs मास्टर साहेब विद्यार्थी सभ सं खैनी...चूना मंगाबय छथिन्ह आ पढाबय के संग- संग खैनी सेहो लगाबैत रहय छथिन्ह. कइटा विद्यार्थी सेहो खैनी के पुड़िया आ चुनौटी राख छथि. एकटा वाक्या तs हमरो संग भेल अछि. एक बेर कॉलेज में एकटा संगि खैनी लगाs कs एक जूमि हमरा तरफ बढ़ा कहलाह लिअ खाउ. हम हुनका कहलिन्ह हम नहिं खाय छी. तs हुनकर साफ कहनाय छलन्हि जे अखन ...

दरभंगा मंडल कारागार (जेल ) के कम्प्यूटर सं जोड़ल जा रहल अछि. एहि कम्प्यूटर के इंटरनेट से सेहो जोड़ल जाएत. असल में जेल के कम्प्यूटर सं जोड़य के मकसद राजधानी पटना सं राज्य केर सभ जेल पर नजर रखनाय छै. कम्प्यूटर सं जुड़ि गेलाह पर बड़का अफसर लोकनि पटना सं बैसल-बैसल सभटा लेखा जोखा लs लेताह. हुनका हर बात के लेल दरभंगा आ राज्य के दोसर जेल जयबाक जरूरत नहिं रहतन्हि. जेल के कर्मचारी सभ ठीक जकां एहि पर काज क s सकथिन्ह एहि लेल कम्प्यूटर ऑपरेटर हुनका सभ के कम्प्यूटर चलाबय के ट्रेनिंग सेहो देथिन्ह.

दरभंगा में मिथिलाक संगीत परम्परा पर आधारित राष्ट्रीय संगोष्ठी केर आयोजन कएल गेल. एकर आयोजन ललित नारायण मिथिला विश्वविद्यालयक स्नातकोत्तर संगीत आओर नाट्यशास्त्र विभाग में कएल गेल. संगोष्ठी के आयोजन संगीत नाटक अकादमी आओर संगीत शोध संस्थान ध्रुपद केन्द्र के ओर सं भेल. एहि संगोष्ठी में विद्वान लोकनि अपन अपन शोध पत्र सं मिथिलाक समृद्ध सांगीतिक परंपरा सं लोक के अवगत करयलथिन्ह.

मधुबनी जिला में जल्दीए केन्द्रीय विद्यालय ( सेंट्र्ल स्कूल ) खुलत. अगर सभ किछ नीक रहल तs ई स्कूल एहि साल सं जिला के पंडौल में खुलि सकय अ. एहि लेल पटना सं केन्द्रीय विद्यालय संगठनक पदाधिकारीगण पंडौल आबि एहि ठामक औद्योगिक प्रागंण स्थित ग्लुकोज स्टार्च प्रशासनिक भवन के निरीक्षण सेहो कएलाह अ. उम्मीद छै जे स्कूल एहि ठाम खुलत. केंद्रीय विद्यालय संगठन के पदाधिकारीगण स्कूल के जगह सं खुश छथिन्ह आ हुनकर कहनाय छनि जे जहिआ हुनका ई जगह सौंप देल जाएत ओकरा महीना दिन के भीतर ओ पढ़ाई शुरू कs देथिन्ह. संगठन विद्यालय के लेल बड़ दिन सं अस्थायी भवन के मांग कs रहल छल. संगठनक पदाधिकारीगण मधुबनी के डीएम साहेब से सेहो मिलला. डीएम साहेब के कहनाय छनि जे जल्दीए जगह के लेल अनुमति दय देल जाएत. केंद्रीय मानव संसाधन विभाग के ओर से मधुबनी में केंद्रीय विद्यालय खोलय के अनुमति दु साल पहिने द देल गेल छल मुदा जगह...मकान नहिं मिलला के कारण ई शुरू नहिं भs सकल आब उम्मीद कएल जाय जे ई जल्दीए शुरू भs सकत.

रेलमंत्री लालू प्रसाद यादव दरभंगा के हायाघाट में मौलाना आजाद नेशनल उर्दू विश्वविद्यालय के तीनटा शिक्षण संस्थान के उद्घाटन करताह. उद्घाटन समारोह में केंद्रीय मानव संसाधन विकास राज्य मंत्री मो. अली अशरफ फातमी सेहो शामिल रहताह. ओना एहि संस्थान के दरभंगा लाबय के पूरा योगदान सांसद महोदय के छनि. अपन क्षेत्र के विकास के लेल ओ नीक काज कs रहला अ. हिनकर देखरेख में दरभंगा में कइटा काज भेल अ. एक जून के होय वाला एहि उद्घाटन समारोह के लेल हायाघाट प्रखंड के चंदनपट्टी गांव के इलियास अहमद नगर में जोर शोर सं तैयारी चलि रहल अछि. इलियास अहमद नगर के 7 एकड़ में स्थित ... बीएड कॉलेज, आईटीआई आओर कामरान स्कूल तीनहुं शिक्षण संस्थान के मान्यता प्राप्त अछि. हैदराबाद के मौलाना आजाद केंद्रीय विश्वविद्यालय के ओर सं एहि शिक्षण संस्थान के संचालन भेनाय दरभंगा... हायाघाट के लेल गर्वक बात अछि. विश्वविद्यालय के एहि केंद्र के अधीन मधुबनी, समस्तीपुर, मुजफ्फरपुर, किशनगंज , अररिया, पूर्णियां, छपरा, सीवान समेत 21 जिला आबैत अछि .

महिला सभ के आत्मनिर्भर बनाबय लेल एकटा सार्थक कदम उठाएल गेल अछि. मिथिला में जतय उद्योग- घंधा आ नौकरी के विशेष अवसर उपलब्ध नहिं अछि. मिथिला पेंटिंग रोजगार के लेल एकटा नीक विकल्प भs सकैत अछि. दुनिया अखन मिथिला... मधुबनी पेंटिंग के दीवाना बनल अछि. एहि मौका के बेसि सं बेसि फायदा उठाबय के जरूरत अछि. रेल मंत्री लालू यादव सेहो संसद में घोषणा कए देने छथिन्ह जे देश के प्रमुख स्टेशन आओर रेल डिब्बा में मधुबनी पेंटिंग के लगाबल जाएत. एकरा लेल पैघ स्तर पर पेंटिंग्स के जरूरत पड़त. त भs जाउ तैयार मौका के फायदा उठाबय लेल. एहि दिशा में अगर कहल जाए तs नीक कोशिश शुरू भेल अछि मधुबनी, पंडौल सं. पंडौल के पास गाम- घर के महिला सभ के लेल मधुबनी पेंटिंग्स के माध्यम सं पाइ कमाबय के प्रशिक्षण कार्यक्रम शुरू कएल गेल. शुरू में एहि प्रशिक्षण कार्यक्रम सं 30 महिला के जोड़ल गेल अछि. महिला के आत्मनिर्भर बनाबय लेल ई एकटा पैघ कदम अछि. ई कार्यक्रम सर्वोप्रयास संस्थानक तरफ सं शुरू कएल गेल अछि . प्रशिक्षण दु माह तक चलत. जकर बाद 10 टा महिला के चयन कएल जाएत आओर हुनका सभ के मार्केटिंग आओर विशेष प्रशिक्षण देल जाएत...

पूर्णिया के ब्रजमोहन ठाकुर विधि महाविद्यालय में पिछला दिन सत्रहवां अंतर्राष्ट्रीय मैथिली सम्मेलनक आयोजन कएल गेल. एहि सम्मेलन में देश भर सं आएल मैथिल विद्वान लोकनि मैथिली के दशा-दिशा पर चर्चा कएलाह. सम्मेलन में मैथिलीक वर्तमान स्थिति आओर विकासक लेल जरूरी कदम पर विचार- विमर्श कएल गेल. एहि अवसर पर अलग मिथिला राज्य के मांग सेहो दोहराएल गेल. सभ गोटे के कहनाय छलन्हि जे बिना अलग राज्य बनने एहि इलाका के विकास संभव नहिं अछि. एहि में मिथिलांचल के नेता लोकनि से आग्रह कएल गेल जे ओ पार्टी पॉलिटिक्स बिसरि मिथिलांचल के विकास पर ध्यान देथि. अगर ऐना भs गेल तs मिथिलांचल विकास के डगर पर दौड़य लागत. सम्मेलन में मैथिली गीत के कार्यक्रम सेहो भेल. विद्यापतिक गीत सं लोक सभ मंत्रमुग्ध भs गेलाह.

पिछला सोलह साल सं मैथिलीक विकास के लेल काज करय वाला मिथिलांगन के उद्देश्य आखिरकार पूर्ण भेल. सोलह साल पहिने जखन मिथिलांगन संस्थाक नींव पड़ल रहय तखन एकरा पाछू सभ सं पैघ उद्देश्य छल दिल्ली सं मैथिली में एकटा पत्रिकाक प्रकाशन. एकरे संगे मैथिली के मिलल एकटा नव ठेकान...त्रैमासिक पत्रिका मिथिलांगन. पत्रिका के नाम संस्था के नाम पर मिथिलांगन छै. दिल्ली के राजेन्द्र भवन में एकर विमोचन कएल गेल. पत्रिकाक विमोचन जवाहर लाल नेहरु विश्वविद्यालय के प्रोफेसर डॉ कर्ण कएलथिन्ह. पहिल बेर एहन भेल अछि जे कोनो पत्रिका में मिथिलांचल के सामाजिक, सांस्कृतिक आओर आर्थिक पहलू के ध्यान में रखैत पत्रिका निकालल गेल अछि. डॉ कर्ण जीक कहनाय छलन्हि जे जेना ई संस्था मिथिलांगन आई धरि काज करैत रहल अ तहिना आगां सेहो अपन काज करैत रहत...अपन मिशन के जारी रखत. एहि अवसर पर गीत नाद आओर गजल के कार्यक्रम सेहो भेल.

दरभंगा में किसान मेला के आयोजन भs रहल अछि. किसान मेला आयोजन करय के फैसला बिहार सरकार के अछि. किसान मेला दरभंगा के संग राज्य के राज्य के तीन आओर मंडल में कएल जाएत. मेला के आयोजन अगिला महीना दरभंगा के संग पटना, भागलपुर आओर पूर्णिया में होएत. मेला सात जून से शुरू होयत. किसान मेला के मार्फत सं बिहार सरकार किसान भाई लोकनि के कृषि...खेतीबारी सं जुड़ल नव- नव जानकारी देबय जाहय छथिन्ह. एहि ठाम किसान भाई लोकनि के खेतीबारी के आधुनिक उपकरण सभ के देखय... जानय के मौका मिलत. एहि ठाम लोकक के कृषि वैज्ञानिक सभ सं खेती के बारे में राय मशविरा करय के मौका सेहो मिलतन्हि.

सकरी हसनपुर खंड पर रेल लाइन बिछाबय के काज जोर शोर सं चलि रहल अछि. नवका लाइन बिछाबय के काज अंतिम चरण में अछि. उम्मीद कएल जा रहल अछि जे काज जुलाई तक पूरा भs जाएत. एहि रेलखंड पर सकरी सं बिरौल तक के काज त जून मास तक पूरा भs जाएत. पटरी बिछाबय के काज पूरा भs गेला के बाद मालगाड़ी चला ट्रैक के बैसाबय के काजय चलत. सकरी स हसनपुर के बीच के कुल दूरी 36 किलोमीटर अछि. ट्रैक नीक जकां बैस गेला के बाद सुरक्षा जांच आओर उच्च स्तरीय निरीक्षण भेला के बाद लोक के लेल खोलि देल जाएत. ई रेल लाइन बनला सं लोक सभ के बड़ सुविधा भs जाएत. अखन बरसाइत में बाढि अएला पर लोक सभ के बड़ कष्ट उठाबय पड़ैत छनि. एकर संगहि संग दरभंगा में एकटा आओर प्लेटफॉर्म बनाओल जाएत. दरभंगा जक्शन पर पांच नंबर प्लेटफॉर्म बनि गेलाह सं लोक के कष्ट किछ कम होएत आओर गाड़ि सभ चलाबय में सेहो सुविधा होएत.

पूरी पीठ के शंकराचार्य स्वामी निश्चलानंद सरस्वती जी महराज 20 जून के दरभंगा आबि रहल छथिन्ह. ओ दरभंगा में 21 जून के स्वामी विवेकानंद कैंसर अस्पताल के भूमि पूजन में शामिल भs लोक सभ के आशीर्वाद देथिन्ह. पीठ परिषद के लोक सभ हुनकर आगमन के तैयारी में जोर शोर सं जुटल छथिन्ह. शंकराचार्य जी महराज 22 जून के कामेश्वर सिंह संस्कृत विश्वविद्यालय के पूर्व कुलपति डॉ जयंत मिश्र जीक रचित युगल श्री गीति मालिका ग्रन्थक लोकार्पण करथिन्ह. ओ 23 तारीख के दरभंगा महाराज जीक जन्मभूमि हरिपुर बक्शीटोल में में शंकराचार्य द्वार के उद्घाटन करताह. एहि दिन हुनकर एकटा कार्यक्रम कलुआही हाईस्कूल में सेहो छनि. एहि ठाम ओ रामसेतु रक्षार्थ आमसभा के संबोधित करथिन्ह. 24 ताऱीख के मधुबनी में रहताह. एकर बाद 25-26 जून दु दिन महिनाम में हिनकर प्रवचन छनि.

एम्हर ओम्हर सं लेल गेल किछ दरभंगाक फोटोग्राफ... मंदिर राज कैम्पस, दरभंगा मलेच्छमर्दनी मंदिर श्यामामाई मंदिर मखदूम बाबा का मजार बेला पैलेस ललित नारायण मिथिला विश्वविद्यालय, राज कैम्पस ललित नारायण मिथिला विश्वविद्यालय, राज कैम्पस कामेश्वरसिंह संस्कृत विश्वविद्यालय कामेश्वरसिंह संस्कृत विश्वविद्यालय कामेश्वरसिंह संस्कृत विश्वविद्यालय नरगौना पैलेस दरभंगा राज किला दरभंगा राज किला ललित नारायण मिथिला विश्वविद्यालय, राज कैम्पस ललित नारायण मिथिला विश्वविद्यालय , राज कैम्पस

कटिहार जोगबनी रेलखंड पर बड़ी लाइन बनाबय के काज भs रहल अछि. काज अखन पूरा नहिं भेल अछि मुदा कई ठाम प्लेटफॉर्म धंसि गेल अछि त कई ठाम प्लेटफार्मक मकान में दरार पड़ि गेल अछि. फारबिसगंज प्लेटफ़ॉर्म बनतहिं धंसि गेल. अररिया स्टेशनक मकान में दरार पड़ि गेल तs पूर्णिया के प्लेटफॉर्मक सीढ़ी टूटि गेल. ओना एकर सभक मरम्मतक काज चलि रहल अछि मुदा निर्माण काज चलतहिं एकरा सभमें दरार पड़ला आ टूटला सं एकर गुणवता पर सवाल उठय लागल अछि. लोक सभ में सेहो गुस्सा छै. फारबिसगंज में तs रेलवे अधिकारी के घेराव सेहो कएल गेल. मिथिला के एहि इलाका के विकास के लेल रेल के बड़का योगदान अछि. मुदा एकर निर्माण काज में अगर कोनो तरहक कोताही बरतल गेल तs ओ खतरनाक साबित भs सकैत अछि. एहि के लेल एहिठाम लोक के जागरूक होबय के जरूरत अछि. काज पर नजर रखय के जरूरत अछि.

सीतामढ़ी में 12 सं 14 मई तक जानकी महोत्सव के आयोजन कएल गेल. तीन दिन चलल एहि महोत्सव में मिथिला केर संग- संग नेपाल आओर दोसरों ठाम के हजारों लोक शामिल भेलाह. महोत्सव में हजारों के संख्या में साधु संत सेहो अएलाह. सत्संग... प्रवचन... कीर्तन सेहो भेल. तीन दिन पूरा सीतामढ़ी शहर जानकीमय भS गेल. पूरा शहर भगवद भक्ति में डूबल रहल. कइटा सांस्कृतिक कार्यक्रम पेश कएल गेल. स्कूली बच्चा लोकनि सेहो कार्यक्रम पेश कएलिह. महोत्सव के आखिरी दिन बुधवार के शहर में एकटा मनोहर झांकी निकालल गेल. सीता मैया के जन्मस्थली होयबाक कारणे ई श्रद्धा के केन्द्र अछि. मुदा एकरा विकास के लेल जे काज होबाक चाहि से नहिं भेल अ. एहि ठाम आबय- जाय... रहय के कोनो नीक इंतजाम नहिं अछि. अगर एहि स्थान के पर्यटन स्थल के रूप में विकसित कएल जाए तs सरकार के राजस्व के प्राप्ति सेहो होएत. आओर आमदनी बढ़ला सs एहि ठामक लोकक जीवन स्तर में सुधार सेहो होएत.