केन्द्रीय मंत्री कएलाह कुसहा के दौरा...

केंद्रीय जल संसाधन मंत्री पवन कुमार बंसल रवि दिन कुसहा आओर भीमनगर के कोसी बराज के दौरा कएलाह. बंसलजी के संग नेपाल के जल संसाधन मंत्री बालकृष्ण खांड सेहो छलखिन्ह. दौरा मे बांध के मरम्मत... रखरखाव आओर सुरक्षा कार्य के जायजा लेलखिन्ह. बिहार के जल संसाधन मंत्री विजयेन्द्र प्रसाद यादव के एहिठाम नीक सं काज कराबय के लेल सराहना सेहो कएलखिन्ह. केंद्रीय मंत्री एहि ठाम के इंजीनियर आओर अफसर सभ के निर्देश देलखिन्ह जे बांध के सुरक्षा के काज नहि रुकबाक चाही... हर वक्त सतर्क रहय के जरूरत अछि. एहि बात पर नजर राखल लेल सेहो कहलखिन्ह जे कतहुं कटाव त नहि भ रहल अछि.
एहि दौरा मे जल संसाधन मंत्री पवन कुमार बंसल जी नेपाल के प्रधानमंत्री माधव कुमार नेपाल सं सेहो भेंट करलखिन्ह आओर कोसी बांध पर चर्चा कएलखिन्ह.  नेपाल के प्रधानमंत्री हुनका सभ तरह सं सहयोग के भरोस देलखिन्ह. आब कोसी पर चौबीसों घंटा निगरानी कएल जाएत.

पिछला साल 18 अगस्त के कुसहा मे बांध टूटला सं उत्तर बिहार के एकटा बड़का इलाका मे भारी तबाही भेल छल. सहरसा... सुपौल... अररिया... पूर्णिया... मधेपुरा मे जान-माल के भारी नुकसान भेल. बाढ़िक पानि सं लाखों लोक के जीवन नरक बनि गेल छल. प्रधानमंत्री बाढ़ि के राष्ट्रीय आपदा घोषित कएने छलखिन्ह. आब ओहि कटाव के पूरा तरह सं बांधि देल गेल अछि. ओर सरकार के दावा अछि जे एहि बेर बांध सं कोनो खतरा नहि अछि.