शिफ्ट नहि होएत रेल परियोजना

बिहार के लेल एकटा नीक खबर अछि. रेल बजट के जे संकेत मिलि रहल अछि ओकरा मुताबिक बिहार सं जे रेल परियोजना के बाहर ल जाए के गप भs रहल छल... आब ओ नहि होएत. बीच मे खबर आएल रहय जे मढौरा, छपरा आओर मधेपुरा के रेल कारखाना के बंगाल शिफ्ट करय के विचार चलि रहल अछि. मुदा एहि बात के पता चलतहि बिहार मे भारी विरोध शुरू होए लागल. पूर्व रेल मंत्री लालू प्रसाद यादव एहि मुद्दा पर रेल मंत्री ममता बनर्जी सं सेहो बात कएलखिन्ह. बीजेपी के ओर से सेहो कहल गेल जे अगर कोनो रेल परियोजना के राज्य सं बाहर ल जाए के कोशिश कएल गेल त बिहार सं एकोटा ट्रेन के गुजरय नहि देल जाएत.

रेल परियोजना पर बिहार के लोक के विरोध के देखैत रेल मंत्रालय के आ जे कहुं रेल मंत्री ममता बनर्जी के परियोजना पर अपन कदम पाछां करय पड़लन्हि. ई सभ बिहार के लोक के ...जनता के जागरूकता के कारण भेल अछि. केन्द्र के तरफ सं अखन धरि बिहार के काफी उपेक्षा कएल गेल अछि. मुदा आब लोक धीरे-धीरे केंद्र के भेदभाव वाला राजनीति के समझि रहल अछि.

बिहार के रेल परियोजना के शिफ्ट करय के मामला एकदम सं राजनीतिक कहल जा सकैत अछि. आओर कहल जा रहल अछि जे एहि के पाछा रेलवे के लोके सभ शामिल छथिन्ह. एहि परियोजना के तत्कालीन रेल मंत्री लालू प्रसाद यादव जी के समय मे शुरू कएल गेल छल. मुदा काज अखन धरि शुरूआती चरण मे अछि. मढौरा मे त जमीन अधिग्रहण के लेल लोक के जे मुआवजा देल जा रहल छल फिलहाल ओकरा पर सेहो रोक लगा देल गेल अछि.

एहि परियोजना के बंगाल नहि गेलाह के बाद आब खबर अछि जे ममता बनर्जी तीन जुलाई के पेश होए वाला रेल बजट मे बंगाल के लेल किछ दोसर नबका परियोजना के घोषणा करतीह. उम्मीद अछि जे ओ किछ नबका परियोजना के संग किछ नबका ट्रेन सेहो शुरू करतीह. एकटा नबका वैगन ट्रॉली फैक्ट्री खोलय के सेहो चर्चा चलि रहल अछि. जे होए.. ओ बंगाल के लेल दस टा आओर परियोजना शुरू करैथि... मुदा जे कतहुं लागल अछि ओकरा त शिफ्ट नहि करैथि. जे होए ई गप कंफर्म त रेल बजट पेश होएला के बादे पता चलत. ताबैति धरि प्रार्थना करू जे बिहार सं रेल परियोजना शिफ्ट नहि होए.

पिछला लेख:

  रेल कारखानाके मामला गरमाएल
 बिहार से छीनो बंगाल को दो
बिहार के झटका