बिहार मे लोकसभा चुनाव सं पहिने बीजेपी के लेल नीक खबर अछि.
बांका सं लोकसभा सदस्य पुतुल कुमारी आओर सिवान सं सांसद ओम प्रकाश यादव सोम दिन बीजेपी मे शामिल भ गेलाह. दुनु निर्दलीय सांसद छथिन्ह.
पुतुल कुमारी अपन पति आओर सांसद दिग्विजय सिंह जीक मृत्यु के बाद 2010 मे चुनाव जीत एमपी बनलीह. दुनु गोटे सोमदिन दिल्ली मे बीजेपी के राष्ट्रीय अध्यक्ष राजनाथ सिंह
के सामने पार्टी मे शामिल भेलाह.
बिहार मे नीतीश कुमार जीक पार्टी जेडीयू सं गठबंधन खत्म भेलाह के बाद बीजेपी अपन पैठ बनाबय मे लागल अछि. एहि बेरक चुनाव मे लड़ाई दिलचस्प होएत.
रामविलास पासवान जी कांग्रेस के साथ तालमेल करय चाहय छथिन्ह. ओ चाहय छथिन्ह जे कांग्रेस हुनकर एलजेपी के संग लालू यादव जीक आरजेडी सं आ फेर नीतीश जीक जेडीयू सं गठबंधन करय.
फिलहाल एहिपर कांग्रेस कोनो मन नहि बनौलक अछि. लालू जी सेहो कांग्रेस पर अपन पार्टी संग तालमेल के लेल दबाव बनौने छथिन्ह. हुनकर कहनाय छनि जे एक संग नहि लड़ला के कारण पिछला बेर पार्टी के भारी नुकसान उठाबय पड़ल.
लालू जी आओर पासवान जी दुनु के माननाय छनि जे कांग्रेस के संग तालमेल करि बीजेपी के मात देल जा सकैत अछि.
एहि सभ के नजर मे राखि बीजेपी सेहो अपना के मजबूत करय मे लागल अछि. बीजेपी नरेंद्र मोदी के पक्ष मे चलि रहल हवा के फायदा उठाबय चाहैत अछि.
बीजेपी के इहो कहनाय अछि जे जखन तक हुनकर पार्टी के विधायक सभ सरकार मे मंत्री छलाह तखन धरि बिहार विकास के राह पर तेजी सं चलि रहल छल...मुदा गठबंधन खत्म भेलाह के बाद बिहार फेर लालू युग मे जा रहल अछि.
चुनाव करीब आबय के संग बीजेपी जनाधार वाला नेता के अपना साथ जोड़य मे लागि गेल अछि. अगिला किछ दिन मे आओर नेता सभ बीजेपी मे शामिल भ सकय छथिन्ह.
कोई टिप्पणी नहीं:
एक टिप्पणी भेजें
अहां अपन विचार/सुझाव एहिठाम लिखु