नवका- पुरनका लेख सर्च करु...

केवटी सं के ?

हमर गाम आओर विधानसभा क्षेत्र केवटी मे 24 अक्तूबर के वोट पड़य वाला अछि. परिसीमन के बाद एकर चुनाव क्षेत्र मे किछ बदलाव आएल अछि. ओना त जिला दरभंगा अछि मुदा परिसीमन के बाद लोकसभा क्षेत्र मधुबनी मे आबि गेल अछि.

केवटी सं अखन अशोक कुमार यादव विधायक छथिन्ह. बीजेपी विधायक अशोकजी पूर्व केंद्रीय मंत्री हुकुमदेव नारायण यादव जीक के सुपुत्र छथिन्ह. 38 साल के अशोक जी तेसर बेर विधायक बनय चाहय छथिन्ह.

अशोक जीक मानल जाए त हुनकर कहनाय छनि कि पिछला विधानसभा चुनाव के दौरान ओ जतेक वादा कएने छलखिन्ह ओकरा करीब-करीब पूरा करि देने छथिन्ह. सिंघवाड़ा मे 34 करोड़ रुपया सं पुल बनएलाह...महम्मदपुर मे सेहो पुल बनि रहल अछि. दूटा पुल लाइन मे अछि.

मौजूदा एमएलए साहब के इहो कहनाय छनि जे कइटा दोसर काज के संग ओ 30 बेडवाला एकटा पीएचसी आओर दोसर 12 प्राथमिक स्वास्थ्य केंद्र के लेल मंजूरी ल लेने छथिन्ह. हिनकर कहनाय छनि जे एहि बेर पार्टी के स्थिति पिछला बेर सं बेसि मजबूत अछि.

केवटी असेम्बली क्षेत्र मे यादव वोट करीब पचास हजार अछि. अशोक जी यादव वोट के संग अगिड़ा-पिछड़ा दूनु वोट मिलय के उम्मीद करि रहल छथिन्ह. हिनका मुस्लिम वोट बंटय के फायदा सेहो मिल सकय छनि.

केवटी विधानसभा क्षेत्र मे हिनकर मुकाबला मुख्यरुप सं आरजेडी के फराज फातमी आओर कांग्रेस के मो. मोहसीन जी सं छनि. फराज फातमी पूर्व केंद्रीय मंत्री मो. अली अशरफ फातमी जीक सुपुत्र छथिन्ह. चुनाव के लsक फराज जी उत्साह सं भरल छथिन्ह.

28 साल के युवा चेहरा फराज फातमी जीके चुनाव मे जीताबय के लेल फातमी जी खुद दिन-राति एक कएने छथिन्ह. फराज अलीगढ़ मुस्लिम विश्वविद्यालय... एएमयू सं डॉक्टर छथिन्ह. मुस्लिम बहुल केवटी मे जीत के उम्मीद करय छथिन्ह.

फातमी जीक उत्साह पर पानि फेर सकैत अछि कांग्रेस. कांग्रेस सं उम्मीदवार मो. मोहसीन हिनका लेल वोटकटवा साबित भ सकय छथिन्ह. हिनका संग 6 टा दोसर आओर मुस्लिम उम्मीदवार ठाड़ छथिन्ह.

अगर केवटी विधानसभा क्षेत्र के वोटिंग परसेंटेज के हिसाब सं देखय जाए त बेसि वोट पड़ला पर मुस्लिम उम्मीदवार के जीतय के उम्मीद रहय छनि. मतदान के प्रतिशत कम रहला पर एहि ठाम सं दोसर उम्मीदवार जीत सकैत अछि.

अगर 1977 के विधानसभा चुनाव सं देखय जाए त एहि साल 53.52 फीसदी वोट पड़ल जेहि सं दुर्गादास राठौर जी चुनाव जीतय मे कामयाब रहला. मुदा एहि के बाद 1980 मे मतदान प्रतिशत बढ़ि क 68.16 भेलाह पर कांग्रेस के शमाएले नबी जीतलाह.

एहिना 1985 मे वोटिंग परसेंट 59.45 रहलाह पर कांग्रेस के प्रो. कलीम अहमद जीतलाह. 1990 मे ई प्रतिशत बढ़ि क 67.30 भ गेल आओर जनता दल के गुलाम सरवर जी चुनाव जीतलाह. 59.66 वोटिंग भेलाह पर सरवर जी 1995 मे फेर जीत गेलाह.

सन 2000 मे गुलाम सरवर आरजेडी सं लड़लाह. मुदा एहि बेर फेर भारी मतदान 68.93 फीसदी होए के कारण ओ जीतए मे कामयाब रहलाह. गुलाम सरवर जी लालू-राबड़ी सरकार मे विधानसभा अध्यक्ष आओर मंत्री सेहो रहलाह.

मुदा फरवरी 2005 आओर अक्तूबर 2005 के चुनाव मे वोटिंग कम होए के कारण अशोक कुमार यादव जीतय मे कामयाब रहलाह. फरवरी 2005 मे 41.91 मतदान भेल जखन कि अक्तूबर 2005 मे 41.50 प्रतिशत.

एहि सं कहल जा सकैत अछि जे अगर मुस्लिम वोट के बंटवारा नहि भेल आओर भारी मतदान भेल त फराज फातमी आ फेर मो. मोहसीन आगां निकलि सकय छथिन्ह. मुदा मतदान प्रतिशत कम रहल त अशोक जी के राह आसान भ जएतन्हि.

ओना ई अखन तक चलय आबि रहल परिपाटी के मुताबिक अछि. आगां सेहो एहिना होएत नहि कहल जा सकैत अछि. एहि मे बदलाव सेहो भ सकैत अछि. गुप्त मतदान मे मतदाता एक तरह सं राजा होएत अछि. जिनका वोट पर मोहर लगा देथिन्ह एमएलए बना देथिन्ह.

(फोटो सौजन्य: मैप्स ऑफ इंडिया)

-:केवटी सं ठाड़ उम्मीदवार के नाम:-
अशोक कुमार यादव- बीजेपी
फराज फातमी-आरजेडी
मो मोहसीन- कांग्रेस
मो एम. इस्लाम- निर्दलीय
मधु रंजन प्रसाद- बीएसपी
रामबाबू साहू- सीपीआईएमएल
बालकृष्ण झा- निर्दलीय
नजरे आलम- निर्दर्लीय
वसी अहमद खान- निर्दलीय
निसार अहमद- निर्दर्लीय
मो सदरे आलम- निर्दर्लीय
मो जुनैद सत्तार- निर्दलीय

Share/Save/Bookmark 
हमर ईमेल:-hellomithilaa@gmail.com

No comments:

Post a Comment

अहांक विचार/सुझाव...