नवका- पुरनका लेख सर्च करु...

मिथिलांचलक पत्रकार के रामनाथ गोयनका अवार्ड

मिथिलांचल के लेल नीक खबर अछि. मिथिलांचलक बेटा-बेटी के पत्रकारिताक सभसं पैघ सम्मान मे सं एक रामनाथ गोयनका अवार्ड सं सम्मानित कएल गेलन्हि.  संयोग एहन जे दूनु पति-पत्नी सेहो छथिन्ह.  दूनु छथिन्ह न्यूज़ 24 चैनलक अजित अंजुम जी आओर आउटलुक पत्रिकाक गीताश्री जी.  अजीत जी बेगूसराय सं छथिन्ह जखन कि गीताश्री जी मुजफ्फरपुर सं.  अजीत जीके ब्राडकास्ट कैटगरी मे पॉलिटकल रिपोर्टिंग के लेल... जखन कि गीताश्री जीक हिंदी पत्रकारिताक प्रिंट कैटगरी मे सम्मानित कएल गेलन्हि.
अजीत अंजुम जीक नाम मीडिया सर्किल के लेल जानल पहचानल नाम छनि.  अजीत जी न्यूज 24 चैनल मे छथिन्ह.  ई चैनल अनुराधा प्रसाद जीक छनि... जे कांग्रेस नेता आओर वरिष्ठ पत्रकार राजीव शुक्ला जीक पत्नी छथीह. बिहारक अनुराधा जी बीजेपी नेता रविशंकर प्रसाद जीक बहिन सेहो छथीह. हिनकर प्रोडक्शन ग्रुप के नाम छनि बीएजी.
अजीत अंजुम जी बीएजी सं 15 साल सं बेसि सं जुड़ल छथिन्ह. आओर हिनका बारे मे कहल जाए छनि जे अजीत जी जेहि प्रोग्राम मे हाथ लगा दैत छथिन्ह ओ हिट भs जाएत अछि. अजीत जी बीएजी के लेल जतेक कार्यक्रम बनएलखिन्ह टीआरपी के मामला मे ओ सभं काफी कामयाब रहल. हिनकर शुरू कएल गेल कार्यक्रम मे 'सनसनी'... 'रेड अलर्ट'... 'पोल-खोल'... 'कौन है'... ‘रेड अलर्ट’ आओर ‘रोजाना’ शामिल अछि.
गीताश्री सेहो करीब 15-17 साल सं पत्रकारिता मे छथीह. हिनका पहिनहुं कइटा सम्मान मिल चुलक छनि. गीताश्री जीके आदिवासी लड़की सभक ट्रैफिकिंग आओर तस्करक गिरोह के पर्दाफाश करय वाला स्टोरी के लेल बेस्ट इनवेस्‍टीगेटिव फीचर कैटगरी मे यूएनएफपीए-लाडली मीडिया अवार्ड मिलि चुकल छनि. गीताश्री प्रिंट के संग संग इलेक्‍ट्रॉनिक आओर वेब मे सेहो काज कs चुकल छथीह. गीताश्री जी वेबदुनिया डाट काम के लेल दिल्ली मे ब्यूरो चीफ छलीह. टीवी कार्यक्रम रोजाना के लेल काज कs चुकल छथीह. कइटा किताब लिख आओर सम्पादन सेहो कs चुकल छथीह. नुक्कड़ नाम सं हिनकर ब्लॉग सेहो छनि.
दूनु पति-पत्नी के दिल्ली मे शुक्र दिन राष्ट्रपति प्रतिभा पाटिल 31 दोसर पत्रकारक संग सम्मानित कएलखिन्ह. रामनाथ गोयनका अवार्ड प्रिंट आओर इलेक्ट्रॉनिक मीडिया के ओहि पत्रकार के देल जाएत अछि जे खबरक नैतिकता... निर्भयता आओर सच्चाई केर मानक के पालन करय छथिन्ह. एहि अवार्ड के 2006 मे रामनाथ गोयनका जीक शताब्दी वर्ष मे शुरू कएल गेल छल. अहां के इहो बताबय चाहब जे गोयनका जीक जन्म दरभंगा मे भेल छलन्हि. आओर देशक सभ सं पैघ अखबार मे सं एक इंडियन एक्सप्रेस आओर जनसत्ता शुरू कएने छलखिन्ह.
Share/Save/Bookmark
हमर ईमेल:-hellomithilaa@gmail.com



No comments:

Post a Comment

अहांक विचार/सुझाव...