बिहार सरकार के जल संसाधन मंत्री विजेन्द्र यादव के कहनाय छनि के एहि बेर कोसी सं बाढ़ि के खतरा नहि अछि. कोसी के जतेक मरम्मत के काज छल ओकरा दुरुस्त करि लेल गेल अछि. मंत्री जी के इहो कहनाय छनि जे कोसी बराज मे जे फाटक फंसल अछि आ बंद अछि ओकरा ठीक करय लेल इंजीनियर... मैकेनिक के भेज देल गेल अछि. आओर एकरा जल्दीए ठीक करि लेल जाएत. मुदा नेपाल सं पानि छोड़ला के कारण... आओर बरसाती पानि आबय के कारण बिहार मे नदी सभ के जलस्तर बढ़ि रहल अछि. पानि बढ़ैत देखि लोक चिंतित छथि आओर सुरक्षित स्थान दिस जाए लगलाह . बाढ़ि वाला इलाका सं लोक के पयालन शुरू भ गेल अछि.
सरकार केतबो किछ कहैत रहौ... जमीन पर ओ चीज नहि देखाएत अछि. बिहार मे सिर्फ कोसीए नदी नहि अछि... बागमती.... कमला बलान... भूतही बलान... गंडक हर साल अपना संग भारी तबाही लाबैत अछि. उत्तर बिहार के हर साल बाढ़िक मारि झेलय पड़ैत अछि. तबाही झेलनाय लोक के लेल एकटा नियति बनि गेल अछि. सरकार केतबो मदद... सहायता... राहत के बात करत... अहां जखन प्रभावित इलाका मे जाएब तखन स्थिति के भयावहता के पता चलत. लागत नहि जे सरकार के तरफ सं किछ भ रहल अछि. लोक सभ केहुना बांध पर... स्कूल मे... सरकारी भवन मे... डीह पर शरण लेने रहय छथिन्ह. कोसी... बागमती आओर कमला बलान के पानि बढ़ला सं अखने कइटा इलाका मे पानि घुसि गेल अछि. कटाव भ रहल अछि. लोक सभ अपन जरूरी सामान लs घर छोड़ि भागि रहल छथिन्ह. प्रशासन के तरफ सं मदद के दावा कएल जा रहल अछि मुदा लोक के कष्ट कम नहि भ रहल अछि.
कई इलाका मे जतय अखन बाढ़ि नहि आएल अछि ओतय के लोक नदी के पानि के कटाव सं डरल छथिन्ह. कटाव एतेक तेजी सं भ रहल अछि जे धार एक-एक... दू-दू किलोमीटर तक एम्हर-ओम्हर भ गेल अछि. लोक के खेत... खलिहान... घर –द्वार सभ धार मे चलि गेल अछि. अखन त लोक के ध्यान केहुना के खुद के... परिवार के... माल-जाल के बचाबय के छनि... मुदा जखन बाढ़ि के बाद... पानि कम भेलाह के बाद लौटता त धार मे... कटाव मे सभ किछ बहि गेल रहत... तखन कतs रहल जाए सेहो एकटा प्रॉब्लम अछि. केंद्र आओर राज्य दुनु के तरफ सं किछ ठोस करय के जरूरत अछि. मुदा सभ किछ राजनीति मे फंसि जाएत अछि. पार्टी- पॉलिटिक्स मे अटकि जाएत अछि. आओर एहि मे मारल जाएत अछि आम लोक.
कोई टिप्पणी नहीं:
एक टिप्पणी भेजें
अहां अपन विचार/सुझाव एहिठाम लिखु